“Давхар дээл”-ийн асуудал сөхөгдөж, Засгийн газрын танхимд халаа сэлгээний салхи орох болсонтой холбоотойгоор “дан дээл”-тэй гарсан сайдууд “даарч эхэллээ”. Сүүнд түлэгдсэн хүн тараг үлээнэ гэгчээр өөрсдийгөө хэвлэлээр ээлжлэн магтуулж эхлэв.
Эрүүл мэндийн сайд С.Энхболд салбарынхаа 100 жилийн ойгоор далимдуулан бараг л сүүлийн 100 жилд тодроогүй сайн ажиллаж байгаа сайд мэтээр өөрийгөө эвтэйхэн гэгч нь Пи Ар-даж орхив. Цар тахалд угаасаа дөжирсөн монголчууд түүнийг сайд байх үед 1982 хүн эндсэн асуудлыг байх л ёстой зүйл мэтээр өмөөрч өмөлзөөд өнгөрөв.
Соёлын сайд Ч.Номин ч өөрийгөө 2021 онд тодорсон оны онцлох улс төрч эмэгтэй гэж сониноор магтуулаад амжив. Тэрхүү магтаал дотор нь улс төрд хамгийн том “олз” олсон овсгоотой сүйхээтэй “жинхэнэ улс төрч” гэсэн чка тодотгол нь давс нь ихэдсэн хоол шиг уншихад “гашуун“ оргиулж байгаа гэж жигтэйхэн.
Сандарсан “дан дээлт”-үүд парламентад хэсэг бүлгээрээ лобби хийх гэж гишүүдийн өмнө хойно орж үзэж тарж байгаа сурагтай. Үнэндээ цагаа тулахад энэ засгаас явахыг хэн хүсэхэв. Харин бодит байдалд дүн шинжилгээ хийхэд ХНХ-ын сайд А.Ариунзаяа, Соёлын сайд Ч.Номин нар сая болсон МАН-ын Их хурлын дараа Удирдах зөвлөлийн гишүүн болж уяагаа бөхөлсөн тулдаа л сугарахгүй үлдэх бололтой.
Тэгвэл “дан дээлт”-үүд битгий хэл “давхар дээлт” ч барьц алдаж байгаа харагдана. Сандарсандаа бүр өөрийгөө “загнаж, занчаад” аваадахав. “Урд хөл бүдрэхэд хойд хөлийг ташуурдана” гэгчээр Эрүүл мэндийн сайд С.Энхболд, онцгой, цагдаа, мэргэжлийн хяналт, УОК-ын нарийн бичгийн дарга нараа өмнөө дөнгөж сургуульд орсон зургаан настнууд шиг эгнүүлэн суулгаж байгаад сүржин гээч нь “сэлэм” эргүүлээд авав. Бүтэн хоёр жил өнгөрөөд байхад өнөө болтол тусгаарлах байрны зохион байгуулалтаа ч хийж чадахгүй байгаа дарга нарыг “ажлаа өг” гэж сүрхий айлгав.
Уг нь гадаадаас ирсэн иргэдийг гурав хоног тусгаарлах шийдвэр энэ сарын 25-наас мөрдөгдөж эхэлсэн ч өөр өөр онгоцоор ирсэн хүмүүсийг нэг дор хонь мал шиг бөөгнүүлж өдөржин хольж, “хорьчихоод” аль өглөө ирсэн хүмүүсийг бүр орой болсон хойно л “буудал” нэртэй дөнгөө ядсан оромжинд оруулсанаас үүдэн ийнхүү нийгмийн сүлжээгээр дүүрэн бухимдалын аянга нүргэлж буй. Эцэстээ иргэдийн энэ бухимдал өөрийг нь онилж суудлаас нь дэнжигнүүлэх шалтаг шалтгаан болж мэдэх эрсдэл үүссэн тул бушуухан шиг бүтэлгүй нөхөд рүү “цурам” тавьж амиа хоохойлов. Хоёр гурван жилийн өмнө бол иймэрхүү сэлэм эргүүлэлтээр суудлаа бөхлөх нь байтугай бүр суга дэвшиж Ерөнхий сайд ч болж болохоор нийгэм алга ташин хүлээн авдаг байсан. Одоо харин түүний шүд зууж байгаад хэлсэн “Бүх юманд Шадар сайд, Ерөнхий сайд нь оролцох ёстой юм уу. Чадахгүй бол ажлаа өг” хэмээсэн үгэнд уяран хайлж өмөлзөх өр нимгэн ард түмэн хэд үлдсэн юм бол доо.
Он солигдохын өмнөх манай улс төрийн “дүр тоглолт” нэг иймэрхүү, бараг “Гэгээн Муза” гардуулчихмаар уярал хайлалтайхан шиг өрнөж байна.
Одоогоор сэтгэгдэл алга байна
