Оном сангийн ТУЗ-ийн дарга, доктор Д.Наранбаатар нэгэн сайн мэдээ дуулгалаа. Тэрээр хэлэхдээ “Энэ оны 4 дүгээр сараас хойш энэ эмийн судалгаа эхэлж улмаар 10 дугаар сарын дундуур судалгааны үр дүнгүүд нь гарсан. Харин сая 12 дугаар сарын 22-нд АНУ-ын Хүнс эмийн агентлагаар батлагдсан байна. Энэ эм Сарс коронавирүс 2-ын халдвараас үүсч байгаа Ковид-19 өвчний эсрэг маш өндөр үйлчилгээтэй болох нь тогтоогдсон. Сая энэ сарын 24-нд Science сэтгүүлийн тэргүүн нүүрэн дээр энэ эмийн тухай материал нийтлэгдсэн. Файзер компаний үйлдвэрлэсэн paxlovid эм нь хүн төрөлхтөнд шинэ итгэл найдвар төрүүлж байна” гэлээ. Энэхүү таблетка эм нь Сарс коронавирүс 2-ийн 30 гаруй уургаас хамгийн чухал уургийг өөрийгөө угсрахад нь хориглон зогсоох үүрэг гүйцэтгэх үйлчилгээтэй аж. Түүний хэлснээр “Энэ эмийн эмнэлзүйн хоёр гуравдугаар шатны судалгаа зэрэг явагдаж , 3 мянга гаруй хүн оролцсон судалгаагаар эрсдэл өндөртэй хүмүүст хүртэл халдвар авсан, шинж тэмдэг илэрснээс нь хойш 5 хоногийн дотор уг эмийг уулгахад эмнэлэгт хэвтэх болоод нас баралтыг 88 хувиар бууруулсан үр дүн гарсан” гэнэ.
Харин тааруухан мэдээ нь гэвэл уг эмийн химийн бүтэц нэлээд нарийвчлал шаардаж буй учраас их хэмжээгээр үйлдвэрлэхэд төвөгтэй байж магадгүй байгаа юм. Гэхдээ боломжгүй зүйл огт биш Их хэмжээгээр үйлдвэрлээд дэлхий нийтийн хүртээл болоход багагүй хугацаа орох төлөвтэй харагдаж байна. Д.Наранбаатар доктор “...Сайн мэдээ нь гэвэл бүх эмийн патентуудыг аваад хөгжиж буй улс орнуудад хямд үнээр үйлдвэрлэх боломжийг олгодог.Та бүхэн бүгдээрээ сайн мэдэж байгаа. Элэгний С вирүсийг устгах Оном сангийн санаачилсан Элэг бүтэн Монгол хөтөлбөрийн хүрээнд элэгний С вирүсийн эм 200-гаас 300 дахин хямдарч Монгол улсад нэвтэрсэн шүү дээ. Энэ үйл явцтай төстэй. Ер нь бол дэлхийд эмийн хүртээмжийг сайжруулах хүрээнд дэлхийн эмийн компаниуд ХҮРТЭЭМЖ хөтөлбөртэй гэрээ байгуулсан. Дэлхийн 95 улс нэгдсэн энэ гэрээг аль эрт байгуулчихсан учраас шинжлэх ухааны энэ гайхамшигт ололтыг бид нар хүртэх боломжтой болж байгаа юм. Бид нар, манай эмийн компаниуд Файзер компанитай энэ эмийг хямд үнэ, хямд өртөгөөр оруулж ирээд эмчилгээнд нэвтрүүлэх чиглэлээр ажиллах нь зүйтэй гэж бодож байна” гэлээ.
Одоогоор сэтгэгдэл алга байна
