Идэр ес эхэллээ. Үүнтэй зэрэгцээд идэрхэн ЕС ч хөдлөөд эхэллээ.
Үнэндээ хөдлөхөөс ч өөр арга байхгүй. Намынхаа 30 дахь Их хурлаар тэр урьд нь сул шахуу байсан мориныхоо эмээлийн олом жирмийг жавхайтал нь татаад авлаа.
Одоо эмээл дээрээ бат суугаад Ерөнхий сайдын дээлэн дээрээ намын даргын дах давхарлаад өмсчихсөн, бас болоогүй АТГ хэмээх айхтар яргай ташуур агсчихсан түүнийг ямар тэнэг нь сөрөх гэж.
Тиймдээ ч ШИНЭ ЭРГЭЛТ-ийн бодлогоо хэрэгжүүлэхээр эргэлт буцалтгүй шийджээ. Гэхдээ түүнийг зууны гэж тодотгосон 6 эргэлтийн, 6 сэргэлтийн энэ бодлогоо хэрэгжүүлэхэд нь дан дээлтэй хөнгөн жингийн сайдууд нь садаа болж буй нь үнэн.
Айлын түлш тасарч гал алдсан ч, хүүхэд нь бүлээрч эмнэлэг бараадсан ч, мал хуй нь өвчилж тариа будаа нь тасалдсан ч, үүд хаалга түгжигдэж өрх дээвэр татагдсан ч түүнгүйгээр асуудлаа шийдэж чадахгүй бүх зүйлийг асууж бүлтэлзэх зориг золбоогүй үхээнц нөхөд түүнд хань болж чадахгүйг өнгөрсөн хугацаанд хангалттай харсан.
Засгийн газар гүйцэтгэх засаглалын жолооны хүрд болохоос бус гүйж яваад бүдрээд уйлдаг хүүхдийн цэцэрлэг биш. Сайдын сургалтын төв бүр ч биш. Чуулганы танхим руу бодлогоо батлуулна гэж барьж ороод гишүүдийн асуултад мад тавиулдаг “зөөлөн боорцог биш хатуу самар” л Ерөнхий сайдад хань болно.
2019 онд батлагдсан Үндсэн хуулийн нэмэлт өөрчлөлтөөр хэнийгээ томилж, бас хэнийгээ чөлөөлөх, хэнийгээ халамжилж хэндээ хариуцлага тооцох бүрэн эрхийг Засгийн тэргүүнд өгчихсөн. Тиймээс тавьж чадаагүй зам, нээж чадаагүй боомт, торгоож чадаагүй тахал, хамгаалж чадаагүй байгаль, хангаж чадаагүй шатахуун, явуулж чадаагүй төслүүдийн чинь төлөө та нарт хариуцлага тооцлоо гэхэд ЯАГААД ? гэж асуух бүдүүн зүрхтэй нөхөр байхгүйг ч тэр мэдэхийн дээдээр мэдэж байгаа.
Сая Монгол Ардын Намын бүлгийн хурлаар Ковидын хуулийг дахиад 6 сар сунгах Засгийн газрын саналыг дэмжчихлээ. Энэ нь омикрон хувилбарын шинэ давалгаа Монголд орж ирж болзошгүй эрсдэл, Засгийн газарт цар тахлын онцгой нөхцөл байдлын үед түргэн шуурхай шийдвэр гаргах боломжийг нь үлдээхтэй холбоотой гэсэн өнгөцхөн тайлбар хэлж байгаа ч энэ бүхний цаана шинээр бүрдэх Засгийн газрын шинэ бүрэлдэхүүний асуудал нуугдаж байгаа гээд хэлчихэд хэтрүүлсэн болохгүй.
Ерөнхий сайд танхимаа давхар дээлтэй сайдуудаар бүрдүүлж бяр нэмэхэд Ковидын хууль бие халаалтын үүрэг гүйцэтгэнэ. Шуудхан хэлэхэд шинэ очих сайдууд тухайн яамандаа баг болж ажиллах хүмүүсийнхээ томилгоог Төрийн албаны хууль гэх тээг босгогүйгээр төвөггүй түргэн хийхэд Ковидын хууль туслах учиртайг урьдчилан тооцоолсон л байж таарна.
Мэдээж сөрөг хүчний болон нам доторх ганц нэг улс төрч Ковидын хуулийн хугацаа сунгахыг дэмжихүй байгаагаа илэрхийлж улс төрийн хувийн тоглолтын оноо цуглуулах ч энэ нь төдий л газар авч гавихгүй.
Энэ оны сүүлээр хугацаа нь дуусах ёстой байсан цахилгаан , дулаан, ус, хогны чинь төлбөрийн хөнгөлөлт чөлөөлөлтийг дахин 6 сараар сунгах боллоо гэхэд л даржин ард түмэн алга нижигнүүлэн ташна.
Одоо улс ТӨРИЙН шинэ ЭРГЭЛТИЙН хамгийн гол өрнөлийн тухай өгүүлье.
Хэдхэн хоногийн өмнө УИХ-ын гишүүн Т.Доржханд, Н.Ганибал, Ш.Адьшаа болон хуульч Э.Үүрцайх “Давхар дээл”-ийн асуудлаар Үндсэн хуулийн цэцэд хандсан. Энэ нь огтоос тохиолдлын хэрэг биш гэдгийг ч тухайн үед хэвлэлүүд ид мэдээлж байлаа.
Ялангуяа ХҮН намын Т.Доржхандыг жаахан маажих юм бол цаана нь МАН цухуйж байдаг гэж хардагсад энэ явдлыг огтхон ч гайхахгүй хүлээж авсныг нуух юун. Харин Ш.Адьшаа, Н.Ганибал нарын тухайд гэнэхэнээр бодох юм бол парламент дахь сөрөг хүчний гишүүд л ҮХЦ-д хандсан мэт харагдаж болох ч үнэн хэрэгтээ тэдний цаана Ерөнхий сайдын зөвлөх икс Ерөнхийлөгч үнэртээд байсныг тухайн үед улс төрийн хүрээнийхэн шивэр авир хийгээд өнгөрсөн.
Тэгвэл тэдний ҮХЦ-д өгсөн “Давхар дээл”-ийн маргааныг ҮХЦ-ийн дунд суудлын хуралдаанаар энэ сарын 27-нд хэлэлцэх товч гарчээ.
Хэрэв цэц Засгийн газрыг дээлээ давхарлахад ганц саад болоод байгаа Монгол Улсын Үндсэн хуулийн нэмэлт, өөрчлөлтийн Гучин ес дугаар зүйлийн 1 дахь заалтыг хэлэлцэж, “Үндсэн хууль зөрчсөн” гэж үзвэл заавал Үндсэн хуульд өөрчлөлт оруулж үйлээ үзэхгүйгээр ПАРЛАМЕНТ ХЭМЭЭХ АРСЛАНТАЙ АВДАРНААС хэд хэдэн үзүүрсгэн дээл гаргаж ирээд гангалчих боломж Ерөнхий сайд Л.Оюун-Эрдэний өмнө цэлийтэл нээгдэнэ.
Харин энэ алтан боломж 12 дугаар сарын 31-ний өдөр цагийн зүү яг гозойж байхад эрхэм Ерөнхий сайдын гарт шинэ жилийн бэлэг болж ирэх бололтой. Учир нь шинэ оны 01 дүгээр сарын 01-н гэхэд шинэ байгуулагдах 2 яам л лав үйл ажиллагаагаа эхлүүлсэн байх хуультай билээ.
Яагаад засах шаардлагатай гэхээр Монгол Улсын Үндсэн хуулийн Гучин есдүгээр зүйлд “...Засгийн газрын дөрвөөс илүүгүй гишүүн Улсын Их Хурлын гишүүний албан тушаалыг хавсарч болно.” Гэсэн зөрчилтэй заалтыг нэмснээр УИХ-ын гишүүдийн Засгийн газрын гишүүдийн тогтоогдсон орон тоонд хүртэл Засгийн газрын гишүүний албан тушаалыг хавсран гүйцэтгэхээр томилогдох боломжтой байх бүрэн эрхийг тодорхойлсон Монгол Улсын Үндсэн хуулийн Хорин ес дүгээр зүйлийн 1 дэх хэсгийн заалттай зөрчилдөж, УИХ-ын гишүүдийн эрхийг тэгш байдлыг алдагдуулж, Үндсэн хуулийн үзэл баримтлал, суурь үзэл санаанд харшилсан зохицуулалт болжээ. Өөр өнцгөөс тайлбарлавал УИХ-ын гишүүнгүй ЗГ бүрдсэн гэж бодъё, ЗГ-аас 4 хүртэлх ЗГ-ын гишүүн УИХ гишүүнийг давхар хиймээр байна гээд хүсэлт гаргаад томилогдох хууль эрхзүйн орчин бүрдэж байна гэсэн үг. Үүгээрээ ард түмнээс сонгогддоггүй УИХ-ын 4 гишүүнтэй болж Үндсэн хууль эвдэгдэнэ л гэсэн үг. Тиймээс засахаас өөр гарцгүй!
Харин энэ гаргалгааг олж харсан ч амаа нээхгүй таг жимбийгсэд байхад, олонх нь айсуй шинэ жилийн оргилуун дарсандаа хөөрч догдлоод омикрон байтугайг ч анзаарах сөхөө алга.
Ес ч эхэллээ. Үүнтэй зэрэгцээд ЕС ч хөдлөөд эхэллээ. Хөөрхий дан дээлтэй сайдууд СҮҮЛЧИЙН ШИНЭ ЖИЛ гэж гунигтайхан гунганалдсаар явж одох нь....Үргэлжлэл бий. << Өмнөх нийтлэл >>
Одоогоор сэтгэгдэл алга байна
