Коронавирусийн Омикрон хувилбарын халдвар тархалтаас сэргийлэхийн тулд зарим баяр наадмаасаа татгалзахыг Дэлхийн Эрүүл Мэндийн Байгууллага уриалсан байна. Баяр ёслолын арга хэмжээг цуцлах нь хэн нэгнээ амьдралаас буцаасанаас илүү дээр гэж ДЭМБ-ын ерөнхий нарийн бичгийн дарга Тедрос Адханом Гебрейесус хэлсэн байна. Учир нь омикрон хувилбар дельта хувилбараас илүү хурдтай тархаж байгааг тэрээр анхааруулжээ. Тиймээс шинэ жилийн баярын олон нийтийг хамарсан арга хэмжээнүүд Омикрон хувилбарын тархалтыг нэмэгдүүлэхээс болгоомжилж байна. Франц, Герман зэрэг улсууд хорио цээрийн дэглэмээ чангаруулж, иргэдийн шилжилт хөдөлгөөнийг хязгаарлах арга хэмжээ авч эхэлсэн бол Нидерланд улс энэ долоо хоногоос эхлэн хөл хорионы хатуу дэглэмд шилжээд байна.
АНУ-ын ерөнхийлөгч Жо Байден одоогоор улс орноо хөл хорионы дэглэмд шилжүүлэх төлөвлөгөөгүй байгааг Цагаан ордон мэдэгдсэн байна. Гэхдээ тус улсын халдварт өвчин судлалын топ мэргэжилтэн Энтони Фаучи өмнө нь Зул сарын баярын шилжилт хөдөлгөөн Омикрон хувилбарын тархалтыг огцом нэмэгдүүлэх магадлалтайг анхааруулсан билээ..
Их Британийн Ерөнхий сайд Борис Жонсон шаардлагатай тохиолдолд авч хэрэгжүүлэх нөөц төлөвлөгөө Засгийн газарт нь байгаа ч одоогоор ямар нэг алхам хийх төлөвлөгөөгүй байгаа гэлээ.
Харин Лондон хотын Трафалгарын талбайд жил бүр зохион байгуулагддаг шинэ жилийн баярыг энэ жил “нийтийн аюулгүй байдлыг хангах үүднээс” цуцалж байгааг тус хотын захирагч Садик Хан мэдэгджээ.
Дашрамд дурдахад ирэх оны дунд гэхэд дэлхийн хүн амын 70 хувь вакцинжуулалтад хамрагдаж чадвал цар тахал 2022 онд эцэс болох боломжтой гэж үзэж байна.
Одоогоор сэтгэгдэл алга байна
