УЛААНБААТАРТ ЖИЛД ДУНДЖААР 40 МЯНГАН ИРГЭН ШИЛЖИН ИРДЭГ
Чухал мэдээ
3 years, 8 months өмнө
Улаанбаатар хотод 2020 онд 31,708 иргэн албан ёсоор шилжиж ирсэн байна. Үүн дээр нийслэлийн хүн амын цэвэр өсөлт 40 мянгыг нэмэхээр Улаанбаатар хотын иргэдийн тоо нэг жилийн хугацаанд 80 мянга гаруйгаар нэмэгдэж байгаа юм. Энэ тоонд нийслэлд түр оршин суугчдыг оруулаагүй. Тэгэхээр ойрын 10 жилдээ Улаанбаатар хотын хүн амын тоо 2.5 саяд хүрэх тооцоолол гарчээ. Улсын хэмжээний их дээд сургуулиудын 96 хувь, худалдаа, үйлчилгээний 81 хувь, бүртгэлтэй аж ахуйн нэгжийн 75 хувь, ДНБ-ий 66 хувь, хэвтэж эмчлүүлсэн иргэдийн 56 хувь Улаанбаатарт ногдож байна. Хөдөө орон нутгаас шилжих ирж буй иргэдийн үндсэн зорилго нь ажилтай болох, орлогоо нэмэгдүүлэх, дээд боловсрол эзэмших. Хот доторх төвлөрлийн тухайд зөвхөн Их тойрууд 355 мянган ажлын байр байршиж байна. Энэ нь хэт төвлөрлийг бий болгож буй бас нэг шалтгаан. Сүүлийн жилүүдэд авто замын сүлжээ 19 хувиар нэмэгдсэн ч автомашины тоо гурав дахин өссөн. Ирэх гурван жилийн хугацаанд жил тутамд машины тоо 80 мянгаар өснө гэж тооцвол Улаанбаатар хотод зорчиж буй тээврийн хэрэгслийн тоо 700 мянгаас нэг саяд хүрэх динамик тооцоо гарсан гэнэ. Түгжрэлийн өртгийг тооцож үзэхэд, 2020 оны байдлаар 2.7 их наяд төгрөг буюу нэг тэрбум орчим ам.долларыг шууд болон шууд бусаар бид түгжрэлд зарцуулсан байдаг. Энэ байдлаар, юу ч хийхгүйгээр, ямар ч арга хэмжээ авахгүйгээр үргэлжлэх юм бол бид таван жилийн дараа 8.5 тэрбум ам.долларыг түгжрэлд зарцуулна . Японы ЖАЙКА-аас хийсэн судалгаагаар энэ байдал цаашид хэвээр үргэлжилбэл хоёр жилийн дараа гэхэд Улаанбаатар хотын авто замын хөдөлгөөн тэг зогсолтод орох аж.
