Өнөөдөр Монголын хөлбөмбөгийн нэрт тайлбарлагч Э.Балжинням нас барсан тухай гунигт мэдээ хөлбөмбөг сонирхогчид төдийгүй Балжааг таньдаг, мэддэг бүх хүний зүрхэнд харуусал авчирлаа.
Тэрээр 2006 оны 6 сард болсон хөлбөмбөгийн дэлхийн аварга шалгаруулах тэмцээнийг тайлбарлаж анх тайлбарлагчийнхаа замналыг эхэлсэн юм.
Тэрээр нэгэн ярилцлагадаа “... “Советский спорт” сонинг захиалдаг байсан нь намайг хөлбөмбөгт хөтөлсөн. Эхэндээ тамирчдын зургийг хайчилж, дэвтэртээ наадаг байлаа. Дараа нь гарчгийг нь толь бичгээс орчуулдаг боллоо. Азаар есдүгээр ангид хөлбөмбөг сонирхдог н.Зандан багштайгаа таарч, хөлбөмбөгийн тайлбарлагчийн яриаг, ойлгохгүй өгүүлбэрүүдийг багшаараа орчуулуулж, хөлбөмбөгт орсон доо” хэмээн өгүүлж байж билээ.
Тэр хөлбөмбөгт үнэн голоосоо хайртай, ёстой л зүрх сэтгэлээ өгсөн нэгэн байлаа. Түүний хийсэн тайлбар тоглолт бүрийг чимж, амьд болгож, яг л хөлбөмбөгийн талбай дээр түүнтэй хамт байгаа мэт догдлолт мэдрэмжийг төрүүлдэг байв.
Хөдөө суманд долоо хоногт нэг удаа шуудан ирэхэд “Советский спорт” сонины зургаан дугаар ирнэ. Тэр зургаан дугаарыг дараагийн шуудан ирэх мягмар гараг хүртэл бүгдийг нь цээжилдэг байсан түүний багын гайхам түүх хөлбөмбөгт хөтөлжээ.
Тэрээр амьдралынхаа туршид "Английн премьер лиг", "ЕХБХ-ний аваргуудын лиг", " Европын АШТ", "Хөлбөмбөгийн ДАШТ" болон Монголын хөлбөмбөгийн "Хүрхрээ лиг", "Пепси лиг" гээд гадаад дотоодын 1000 гаруй тоглолтыг тайлбарлан бидэнд хүргэсэн юм. Тайлбарлагч Э.Балжиннямын тэр л нүдэнд дулаахан эгэл сайхан төрх, сэтгэл зүрхэнд мэдрэгдтэл сайхан тайлбарлан хүргэсэн хөлбөмбөгийн олон олон тоглолтууд нь монголчууд бидний сэтгэл зүрхэнд мөнхөд хадагдан үлдлээ.
Тэр эгэлгүй авьяаст тайлбарлагч, эгэл сайхан нэгэн байлаа.
Одоогоор сэтгэгдэл алга байна
