ОНОМ сангийн ТУЗ-ийн дарга, доктор Д.Наранбаатар омикрон хувилбарын талаар хамгийн сүүлийн үеийн шинжлэх ухааны тоо баримтуудад тулгуурлан мэдээлэл хийлээ.
Тэрээр “Нэгдүгээрт омикроны хувьд халдварлах чадвар Дельтагаас ч илүү өндөр юм байна гэдэг нь нэгэнт тодорхой болж байна. Өмнө нь коронавирүсийн халдвар аваад эдгэрч дархлаа тогтсон хүмүүс дахин халдвар авах эрсдэлтэй гэдэг нь ч тогтоогдсон. Гурван тун Файзерын вакцинтай хүмүүсийн хувьд хүндрэлээс болон шинж тэмдэгтэй өвдөхөөс хамгаалах хувь нь 75 орчим хувьтай байна гэсэн судалгааны үр дүнг Английн эрдэмтэд танилцуулсан” тухай дурьдлаа. Хэдийгээр халдварын тоо асар хурдацтай / тухайлбал халдвар авсан 1 хүн 2,5 хүнд халдвар тархааж байгаа / нэмэгдэж байгаа ч сайн мэдээ нь өвдсөн хүмүүсийн дунд өвчний хүндрэл харьцангуй бага байна гэв. Тухайлбал омикрон хувилбарын халдвар авсан хүмүүсийн 90 орчим хувь нь шинж тэмдэггүй буюу маш хөнгөн өвдөж байгаа аж. Өмнө нь халдвар авсан хүмүүсийн 25-30 орчим хувь нь хүчилтөрөгчийн аппаратад зайлшгүй орох шаардлагатай байсан бол энэ хувилбарын тухайд 6.6 хувьтай байгааг Өмнөд Африкийн судалгааны хүрээлэнгүүд мэдээлжээ. Омикрон хувилбарын тухайд хүүхдүүдийн дунд халдвар их тархаж буй ч нас барсан хүүхэд хараахан бүртгэгдээгүй, ер нь нас баралтын тоо тун бага байгаа нь маш сайн мэдээ гэдгийг тэрээр дуулгалаа. Дашрамд дурдахад омикрон хувилбар хамгийн анх 2021 оны 11 дүгээр сарын 11-нд Ботсванад бүртгэгдэж, түүнээс хойш 2 хоногийн дараа Өмнөд Африкт геномын дарааллыг нь тодорхойлсон байдаг. Гэхдээ энэ нь Өмнөд Африкт омикрон анх үүссэн гэсэн үг огт биш, харин хөгжил султай Африкийн бусад улс оронд үүсээд шинжлэх ухаан өндөр хөгжсөн Ботсвана , Өмнөд Африкийн Бүгд Найрамдах Улс л түүнийг илрүүлсэн болох нь тодорхой болж байна гэдгийг тэрээр нэмж хэллээ.
Ер нь вакцины нэмэлт тунгаа хийлгэчихсэн хүмүүсийн хувьд халдварт өртлөө ч гэсэн өвчний хүндрэл нь мэдэгдэхүйц бага, харин вакцин хийлгээгүй хүмүүсийн дунд халдварын тархалт өндөр байгааг Өмнөд Африк дахь судалааны дүн баталж буйг мэдээллээ.
Доктор Д.Наранбаатар “...Халдварын тархалт нь маш их хурдацтай байх тусмаа өвчний хор урхаг багасдаг зүй тогтолтой байдаг тэр дүр зураг ажиглагдаж байна. Хүн төрөлхтөний хувьд энэ нь коронавирүсийн сүүлийн шуурга байж магадгүй гэсэн найдлага асааж байна” гэлээ. Гэхдээ нэг төвөгтэй зүйл нь хэдийгээр өвчний хүндрэл бага байгаа ч гэлээ хүн ам ихтэй улс орнуудад эмнэлгийн багтаамж нь хүрэлцэхгүй хэвээр байх эрсдэл байсаар буйг тэрээр сануулсан. Манай улсын хувьд одоо дельтагийн давалгаа нэгэнт намжиж байгаа, цар тахлын нөхцөл байдлын улмаас хил боомт хаагдаж, бараа бүтээгдэхүүний үнэ асар их өсчихсөн учраас эдийн засаг, иргэдийнхээ амьдралыг бодсон шийдвэр гаргаж шинэ жилийн амралтын өдрүүдийг сунгахаа азнасан нь зөв тактик гэсэн байр суурь илэрхийлэв.
Одоогоор сэтгэгдэл алга байна
