Цар тахлыг гарз багатай даван туулахын төлөө төр түмэнгүй зүтгэж байна. Энэ үйл хэргийн тэргүүн эгнээнд мөнөөх уул уурхайнхан яваа нь түмэнтээ үнэн. Ковид-19 цар тахлын улмаас улсын төсвийн орлого тасалдаж, нийгмийн халамж болоод эрүүл мэндийн зардал эрс өссөн. Энэ үед эрдэс баялгийн салбарын буянаар хүүхдийн мөнгийг 100 мянгаар нь үргэлжлүүлэн олгож, айл өрх, аж ахуйн нэгжийн ус дулаан, цахилгааны зардлыг төр хариуцаж, сайжруулсан шахмал түлшний үнийг хямдруулж, сая төгрөг тэтгэврийн зээлгүй ахмадууддаа өгч, иргэн бүрт 300 мянган төгрөгийн дэмжлэг үзүүлсэн.
Тэгвэл үүнээс гадна уул уурхайнхан маань нийгмийн хариуцлагын хүрээнд зөвхөн 2020 онд гэхэд цар тахлыг даван туулахад 45.9 тэрбум төгрөгийн хандив тусламж үзүүлсэн гэсэн мэдээ байна.. Энэ нь цар тахлын үед 459 мянган хүүхдийн нэг сарын ХҮҮХДИЙН МӨНГӨН тэтгэмжтэй тэнцэх хэмжээхий томоохон дэмжлэг юм.
Үүний зэрэгцээ Засгийн газар, Уул уурхай, хүнд үйлдвэрийн яам Эрдэнэс Монгол компани экспортын төмөр замын бүтээн байгуулалтын ажлуудад онцгой анхаарч байгаа.
Зөвхөн Тавантолгой-Гашуунсухайт чиглэлийн төмөр зам ашиглалтад орсноор жилд 30 сая тонн нүүрс тээвэрлэх боломжтой болох юм.
Эдийн засгийн хувьд нүүрсийг авто тээврээр Гашуунсухайт боомт хүргэхэд тонн тутамд 28-32 ам.долларын зардал гардаг бол төмөр замаар тээвэрлэснээр 8 орчим ам.доллар болж буурах учиртай.
Нэг ёсондоо төмөр замаар нүүрс тээвэр хийснээр 30 сая тонн нүүрс тээвэрлэхэд ганцхан жилд гэхэд 600 орчим сая ам.долларын ашиг гарна гэсэн үг
Мөн Тавантолгой-Зүүнбаян чиглэлийн төмөр замын дагуу байршилтай ашиглалтын 37 орчим тусгай зөвшөөрөлтэй орд газруудыг эдийн засгийн эргэлтэд оруулах нь манай улсын эдийн засгийн өсөлтөд чухал үүрэг гүйцэтгэх юм.
Монгол Улсын стратегийн орд газруудад төрийн төлөөллийг хэрэгжүүлэх чиг үүрэгтэй “Эрдэнэс Монгол” ХХК-ийн тухайд байгалийн баялгаас олсон орлогыг тусгай санд төвлөрүүлж, хөрөнгө оруулалтын зөв бодлого хэрэгжүүлэхийг юу юуаас илүүтэй чухалчилж байна.
Баялгийн сантай болох хууль батлагдсанаар “Эрдэнэс Монгол” компанийн үйл ажиллагааны цар хүрээ нь өргөжиж үр ашиг нь нэмэгдэнэ. Олсоноо бардаг биш арвижуулдаг улс байх түүхэн зорилго гүйцэлдэнэ.
Түүнчлэн стратегийн ач холбогдол бүхий ордыг ашиглах, түүнийг дагасан дэд бүтцийн төсөл, мега болон нийгмийн хөгжлийг дэмжих төсөлд хөрөнгө оруулалт хийснээр улсын төсөвт ирэх ачааллыг бууруулах нь гарцаагүй билээ.
Өнгөрсөн хугацаанд “Эрдэнэс Монгол” компани стратегийн орд газруудыг эдийн засгийн эргэлтэд оруулж, улмаар байгалийн баялгаас олсон үр өгөөжийг иргэн бүрт хүртээх боломж бүрдүүлэхийн төлөө чармайж ирсэн. Тэр үүргээ ч бүрэн хангалттай биелүүлж байгаа гэхэд болно.
Нэг ёондоо “Эрдэнэс Монгол” ХХК-ийн хувьд байгалийн нөөцийг үр ашигтай ашиглах, уул уурхай, дэд бүтэц, эрчим хүчний салбарт урт хугацааны хөрөнгө оруулалт хийх, эдийн засгийн тогтвортой өсөлтийг хангах үндэсний томоохон хөрөнгө оруулалтын компани болох зорилгоо бүрэн биелүүлэхийн төлөө зүтгэж байна.
Энэ бүхний хажуугаар нүүрсний экспортыг нэмэгдүүлэхэд онцгой анхаарал хандуулж байгаа аж. Энэ хүрээнд Цагаан хад орчмын суурьшлын бүсийг ногоон бүс болгохын тулд төрийн байгууллагуудтай нягт хамтран ажиллаж байгаа юм. Энэ хүрээнд “Уул уурхайн экспортын тээвэрлэлтийн үйл ажиллагаа эрхлэгч аж ахуйн нэгж, байгууллагын жолооч ажилчдыг Цагаан хад суурьшлын бүсэд нэвтрүүлэх” Түр журмыг батлуулж, тээвэрлэгч байгуулага Цагаан хад суурьшлын бүсэд нэвтрэх хүсэлтээ www.smartgobi.com цахим хаягаар мэдүүлэхээр журамлажээ.. Энэ дагуу аж ахуйн нэгжүүд ажилчдын мэдээллийг дэлгэрэнгүй өгөх бөгөөд зайлшгүй өөрийн кемп, байртай байхаас гадна 14 хоногт 1 удаа халдваргүйжүүлэлтийг хийх үүрэг хүлээж байгаа юм.
Юутай ч цар тахлыг ялах нь бидний хувьд цаг хугацааны асуудал. Тиймээс өнөөдөр үүсээд буй хүндрэлийг яаралтай шийдвэрлэхийн сацуу ирээдүйгээ харсан алсын хараатай бодлого явуулж байгалийн баялгаа үр ашигтай ашиглах шинэ менежментийг хэрэгжүүлэхийн төлөө эрдэс баялгийн салбарынхан, тэр дундаа энэ их айлын уураг тархи нь болсон ЭРДЭНЭС МОНГОЛ ХХК-ийнхан зүтгэж байна.
Эрдэс баялаг дээрээ тулгуурласан манай улсын хувьд энэ салбар цар тахлын энэ хүнд үед эдийн засгаа эрсдэлээс хамгаалах вакцины үүрэг гүйцэтгэж байна.
Одоогоор сэтгэгдэл алга байна
