Барууны улс гүрнүүд Украинтай хурцадмал байдлаа намжаахыг Оросоос уриалж, Москвагийн аливаа заналхийллийн эсрэг Киевийг дэмжинэ гэдгээ илэрхийллээ. АНУ-ын Ерөнхийлөгч Жо Байден Их Британийн Ерөнхий сайд Борис Жонсон болон Франц, Герман, Италийн удирдагчидтай ярилцаж, түрэмгийллээс урьдчилан сэргийлэхийн тулд "өөрсдөд байгаа бүх хэрэгслийг" ашиглахаар тохиролцсон байна. Ноён Байден өнөө орой ОХУ-ын Ерөнхийлөгч Владимир Путинтэй цахимаар ярилцах юм байна.
Орос Украины хилийн ойролцоо цэргээ нэмэгдүүлсэн нь түгшүүр төрүүлж байгаа ч Москва үүнийг няцааж Украинд довтлох ямар ч төлөвлөгөөгүй гэж мэдэгдэж байгаа билээ., Тэд харин барууны орнуудыг өөрсдийг нь өдөөн хатгаж байна хэмээн буруутгаж байна. Даваа гарагийн орой болсон бага хурлын үеэр барууны удирдагчид "Орос цэргийн хүчээ нэмэгдүүлж буйд бүгд санаа зовж буйгаа" иэлэрхийлсэн гэж Цагаан ордон мэдэгдэв. Цагаан ордон хэрэв Орос улс түрэмгийлэл үйлдсэн тохиолдолд "Оросын эдийн засагт томоохон бөгөөд ноцтой хохирол учруулах" хамтарсан стратеги боловсруулсан гэж мэдэгдэв. АНУ-ын хэвлэл мэдээллийн хэрэгслүүдийн мэдээлснээр, тэдний Оросын эсрэг авах хориг арга хэмжээнд Оросын банкууд эсвэл дэлхийн санхүүгийн төлбөрийн системд нэвтрэх эрхийг хязгаарлах зэрэг багтаж байна. Харин албаныхан Вашингтон АНУ-ын цэргийн хувьд одоогоор ямар ч хариу арга хэмжээг төлөвлөөгүй гэж мэдэгджээ.
АНУ-ын Төрийн департаментын хэвлэлийн төлөөлөгч Нед Прайс хэлэхдээ, Вашингтоноос авах дараагийн арга хэмжээ гагцхүү Москвагийн үйл ажиллагаанаас хамаарна гэсэн юм. Украины эрх баригчид Москва нэгдүгээр сарын сүүлээр цэргийн довтолгоо хийхээр төлөвлөж байж магадгүй гэж мэдэгдээд байгаа юм. Гэвч Кремль хурцадмал байдлыг өдөөсөн гэх барууны орнуудын "түрэмгий, дайсагнасан үг хэллэг"-ийг эрс буруутгаж байна. Ноён Путины хэвлэлийн нарийн бичгийн дарга Дмитрий Песков "Оросын ерөнхийлөгч Украины асуудлаарх ноён Байдены саналыг "маш анхааралтай сонсох болно" гэжээ. Тэрээр "Хурцадмал байдлыг намжаах цорын ганц арга зам бий.Тэр бол Донбассын асуудлыг хүчээр шийдвэрлэх Киевийн хүсэл зоригийн эсрэг ямар баталгаа гаргах вэ гэдэг явдал" хэмээсэн юм.
Одоогоор сэтгэгдэл алга байна
