Цар тахлын нөхцөл байдал, коронавирүсний омикрон хувилбараас үүдэн БНХАУ ихэд болгоомжилж буй. Үүний урхагаар Эрээн хотын боомтоор гардаг экспорт, импортын бүх бүтээгдэхүүн, ачаа бараа таг гацаад байгаа билээ. Өөрөөр хэлбэл Хятадын тал чингэлэг тээврээс бусад тээврийг таг хориглосон. Ингэхдээ чингэлэг тээврийн үйл ажиллагааг маш нарийн зохион байгуулалтын дор явуулахаар хоёр тал тохиролцож, наад захын шаардлага бүрэн хангагдтал бүх тээврийг зогсоогоод буй билээ. Одоогоор талууд Замын-Үүд, Эрээн хотуудад чингэлэг байршуулах талбай байгуулж, чингэлэг өргөж буулгах калмарын тусламжтайгаар жолооч нар машинаасаа буухгүйгээр ачаа барааг зөөвөрлөх тохиролцоонд хүрсэн ч тээвэр нээх асуудал бас л манай талын хайхрамжгүй байдлаас болж дахин хойшлоод байна. Уг нь энэ сарын 5-наас чингэлэг тээврээр ачаа нэвтрүүлэх ажил эхлэх байсан ч манай талбай дээр газар дээр нь ирж үзсэн Эрээний албаны хүмүүс чингэлэг тээврийн машинууд шатахуун цэнэглэх цэг байхгүй байна гэж шалтаглан дахиад л “луу унжсан” бололтой. Энэ талаар Шадар сайд С.Амарсайханаас тодруулахад " ГХЯ, ЗТЯ энэ чиглэлд холбогдох байгууллагуудтай холбогдон аль болох хурдан нээх тал дээр ажиллаж байна. Харамсалтай нь биднээс шалтгаалах зүйл бага байна" гэсэн бүрхэг хариулт өгөөд сууж байна. Эрээнээс ирэх төмөр замын тээвэр зогссон, үүн дээр чингэлэг тээвэр гацсан өдөр хоног бүр Монголын талд бараа бүтээгдэхүүний үнийн өсөлт, экспортоос олох эдийн засгийн асар их алдагдал болж хувирч буй нь харамсалтай.
Одоогоор сэтгэгдэл алга байна
