Нүүрснээс үүдэлтэйгээр уур амьсгалд сөрөг нөлөө үзүүлж буй энэ цаг үед Япон улс нүүрсний хэрэглээгээ нэмэгдүүлэх биш харин танах ёстой гэж үзэж байна. Гэвч 2011 онд болсон Фукушимагийн цөмийн гамшигаас үүдэн нүүрсний хэрэглээг дорвитой хумиж чадахгүй байгаа юм. 2010 онд Японы цахилгаан эрчим хүчний гуравны нэгийг дан ганц цөмийн эрчим хүч бүрдүүлж байсан бөгөөд илүү олон атомын цахилгаан станц барихаар төлөвлөж байсан юм. Гэвч үүний дараахан буюу 2011 онд цөмийн цахилгаан станцууд байгалийн гамшигт нэрвэгдэж, Япон бүх атомын цахилгаан станцуудаа хаасан түүхтэй. Энэ явдлаас хойш арван жил гаруйн хугацаа өнгөрсөн ч өнөөдөр тэдгээрийн ихэнх нь хаалттай хэвээр байгаа юм. Учир нь тэдгээрийг дахин ажиллуулах нь нийгмийн маш их эсэргүүцэлтэй тулгарч байна. Түүний оронд Японы хийн цахилгаан станцууд хамгийн их ачааллыг үүрч байна. Гэвч эрчим хүч үйлдвэрлэхэд байгалийн хий хэтэрхий үнэтэй байгаа нь бэрхшээл учруулж байгаа юм.
Үүнээс шалтгаалан Японы Засгийн газар Австралиас хямд үнэтэй нүүрс авч, түүгээр ажиллах 22 цахилгаан станц шинээр барих шийдвэр гаргасан билээ. Энэ нь эдийн засгийн хувьд ихээхэн үр ашигтай хэдий ч байгаль орчинд халтай учраас олон улсын зүгээс Японд нүүрсний хэрэглээгээ зогсоох талаар хүчтэй дарамт шахалт үзүүлж байна. Тэгвэл үүний хариуд Япон улс хуучин нүүрсний үйлдвэрүүдийг хааж, сэргээгдэх эрчим хүч рүү шилжихийн оронд устөрөгч эсвэл аммиакийг шатааж эрчим хүч үйлдвэрлэхийг илүүд үзэж байна. Японы Засгийн газар дэлхийн анхны "устөрөгчийн эдийн засаг"-тай улс болохыг эрмэлзэж байгаа юм.
Мирай (японоор ирээдүй гэсэн үг) бол Тоёотагийн анхны утаа ялгаруулдаггүй цахилгаан машин юм. Энэ бол том Lexus-ийн хэмжээтэй тансаг автомашин юм. Энэхүү машин нь бараг дуу чимээ байхгүй бөгөөд утааны оронд зам дээр бага зэрэг ус дуслуулахаас өөр ямар ч хор хөнөөлгүй юм. Бусад цахилгаан машинуудаас ялгаатай нь Мирай капотны доор түлшний элемент, арын суудал дороо устөрөгчийн савтай байдаг. Устөрөгч нь түлшний хоолойгоор дамжин цахилгаан хөдөлгүүрийг ажиллуулах цахилгаан болж хувирдаг. Энэ нь саран дээр буух нислэгт Аполло сансрын хөлгийг тэжээхэд ашиглаж байсан технологи юм. Гэхдээ олон хүний хувьд энэ технологи нь одоогоор тийм ч оновчтой сонголт гэж харагдахгүй байгаа юм. Учир нь энэ технологи цахилгаан батерейгаас илүү үнэтэй бөгөөд илүү нарийн төвөгтэй байгаад гол асуудал байгаа юм. Элон Маск гэхэд л устөрөгчийн машиныг "тэнэг" гэж нэрлэсэн удаатай. Гэхдээ яг үнэндээ бол энэ тийм биш гэж Тоёота компанийн олон нийттэй харилцах хэлтсийн дарга Хисаши Накай хэлж байна. Тэрээр “Бид устөрөгчийг хүчирхэг бөгөөд маш чухал эрчим хүчний эх үүсвэр гэдэгт бат итгэдэг" гэсэн юм. Сэргээгдэх эрчим хүчийг ашиглан устөрөгчийг уснаас гаргаж авснаар "ногоон устөрөгч" бий болно. Гэхдээ гол асуудал бол “ногоон устөрөгч” гаргахад хэтэрхий их зардалтай. Үүний оронд ихэнх устөрөгчийг байгалийн хий, тэр байтугай нүүрснээс ч гаргаж авах боломжтой. Гэхдээ энэ нь хямд зардалтай ч маш их хүлэмжийн хий ялгаруулах эрсдэлтэй. Харин тэрхүү хүлэмжийн хийг ялгаруулахгүйгээр устөрөгч гаргаж чадвал түүнийг "цэнхэр устөрөгч" гэх бөгөөд Япончууд яг үүнийг хийхийг зорьж байна. Энэ оны эхээр гэхэд л Япон улс Австрали улсын Виктория мужид хүрэн нүүрсийг устөрөгч болгох хамтарсан төслийг эхлүүлсэн. Дараа нь устөрөгчийг хасах 253С хүртэл шингэрүүлж Япон руу зөөвөрлөх тусгайлан бүтээсэн хөлөг онгоцонд тусгай хоолойгоор дамжуулж байна. Одоогоор нүүрснээс устөрөгч гаргах үйлдвэрлэлийн талбайгаас маш их хүлэмжийн хий агаар мандалд гарч байгаа ч ирээдүйд Латробын хөндийгөөс гарч буй хүлэмжийн хийг тогтоон барьж, эрэг орчмын далайн ёроолд шахаж эхэлнэ гэж амлаж байна. Харин уур амьсгалын өөрчлөлтийн эсрэг тэмцэгчид энэ төлөвлөгөөг маш цочирдон хүлээн авч байна.
Эх сурвалж: BBC World
Одоогоор сэтгэгдэл алга байна
