БНСУ-ын дунд сургуулийн сурагчид монгол охиныг зургаан цагийн турш зодон, хүчээр согтууруулах ундаа уулгасан хэрэг гарсан талаар Солонгосын MBC телевиз мэдээллээ. Тодруулбал, дунд ангийн дөрвөн эмэгтэй сурагч 13 настай монгол сурагч охиныг зургаан цагийн турш өрөөнд хорьж, зоджээ. Улмаар тэд хохирогч охинд хүчээр согтууруулах ундаа уулгаж видео бичлэг хүртэл хийн бичлэгийг 5000 воноор олон нийтэд зарсан байна. Тус хэргийн улмаас хохирогч охин хичээлдээ явж чадахгүй байдалд хүрч сэтгэл санааны гүн цочролд орсон байна. Энэхүү хэргийг Солонгос улсын цагдаагийн байгууллага шалгаж эхэлсэн ч сурагчдад эрүүгийн хариуцлага хүлээлгэх боломжгүй гэж үзжээ.
Хохирогч охин БНСУ-д арав гаруй жил амьдарч байгаа бөгөөд тэрбээр хэлэхдээ “Тухайн үед маш их согтсон байсан. Өрөөнөөс гаргахгүйн тулд солонгос оюутнууд гар, хөлийг минь скочоор хүлж, нүүр рүү алгадаж байсан. Ингэж байснаас үхсэн нь дээр гэж бодсон. Бичлэг олон нийтэд дэлгэгдсэнээс хойш хичээлдээ явах боломжгүй болсон” гэж мэдүүлжээ.
Одоогоор сэтгэгдэл алга байна
