Өнөөдөр ХБХХЕГ, ХХҮЕГ-тай хамтран хөгжлийн бэрхшээлтэй иргэдийг хөдөлмөрт зуучлах ЭЭЛТЭЙ ЭКСПО-2021-ийг хувийн хэвшлийн 50 гаруй ААНБ-тай хамтран зохион байгууллаа. Хөдөлмөр эрхлэлт бол нийгмийн хамгааллын хамгийн чухал арга хэрэгсэл. Тэр ч утгаараа Монгол Улсын Засгийн газар нийгмийн тодорхой бүлгүүдийг хөдөлмөр эрхлүүлэх замаар нийгмийн хамгааллаа өөрөө бүрэн хариуцах арга хэрэгслийг ихээхэн чухалчилж байгааг ХНХ-ын дэд сайд онцоллоо. Хөгжлийн бэрхшээлтэй иргэдийг ажлын байраар хангах чиглэлд сүүлийн үед хувийн хэвшлийнхэн олон чухал санаачилга гаргаж байна. Өөрөөр хэлбэл хөгжлийн бэрхшээлтэй иргэдийг авч ажиллуулдаг, тодорхой ажлын байран дээр тохиргоонууд хийдэг шинэ жишиг нэгэнт тогтоод байна. Хөгжлийн бэрхшээлтэй иргэд ч нийгмийн нэг хэсэг болж, цаашид ажил хөдөлмөр эрхлэх замаар өөрийнхөө нийгмийн хамгааллыг бүрэн хариуцах боломжийг алдахгүй байхыг хүсэж байна. Өнөөдрийн экспод ХНХЯ, ХБХХЕГ ,ХХҮЕГ, иргэний нийгмийн байгууллагууд, ажил олгогч нар төдийгүй зарим хөгжлийн бэрхшээлтэй иргэд ч өөрсдөө ажил олгогчийн байр сууринаас оролцсон нь олзуурхууштай. Өнгөрсөн хугацаанд 800 гаруй хөгжлийн бэрхшээлтэй иргэнийг хөдөлмөр эрхлэхэд зуучилсан ч энэ нь хангалттай тоо биш. Тиймээс цаашдаа хөгжлийн бэрхшээлтэй иргэдэд ажлын байр бий болгосон компаниудыг хөдөлмөр эрхлэлтийг дэмжих сангаас дэмжих, татварын хөнгөлөлт үзүүлэх чиглэлд түлхүү анхаарах юм байна. Мөн тус экспод хөгжлийн бэрхшээлтэй иргэд өөрсдийн гараар урласан бараа бүтээгдэхүүнийхээ үзэсгэлэн худалдааг зохион байгуулсан юм.
Одоогоор сэтгэгдэл алга байна
