Тэрээр ерээд онд Монголд дуучин ховор байхад жинхэнэ дуучин, жинхэнэ од, тухайн үеийн охидын шүтээн нь байсан юм.
Л.Байзада энэ хорвоод 49 наслахдаа 120 гаруй дуу зохиож, дуугаараа хүмүүсийн зүрх сэтгэлд хөшөө дурсгалаа босгож, хөг аялгуугаа шингээж урлаж чадсан уран бүтээлч билээ.
Тэртээ 1972 онд Улаанбаатар хотын хоёрдугаар төрөх тасагт мэндэлсэн тэрээр бага ангиа 45 дугаар сургууль, дунд ангиа 13 дугаар сургуульд дүүргэжээ. Улмаар Багшийн сургуулийн хөгжмийн багшийн ангид суралцаж, 1993 онд СУИС-ийн хөгжмийн багшийн ангид гурван жил суралцаж ахуйдаа жинхэнэ од болон гялалзсан юм.
Түүний байгуулсан “ Байзада ба түүний нөхөд” бүжгийн хамтлаг тухайн цагтаа монголын орчин үеийн бүжгийн чиг хандлагыг тодорхойлж, цуурай хадааж байв.
Түүнийг алдарын оргилд аваачсан “Үүрдийн наран” дуу нь 16 хан настайд нь бичигдсэн гэхээр ямар их авьяас билигтэй нэгэн байсныг нь эрхгүй гэрчилнэ.
Тэрээр амьдралынхаа сүүлийн жилүүдийг тун ч даруу чимээгүй өнгөрүүлсэн. Гэхдээ бас зүгээр суугаагүй. Казакстанд 4 жил амьдрахдаа казах хэл дээр бүтэн хоёр концерт тоглосон юм билээ.
Тэр өөрийнхөө казахаар дуулсан буцаж буй шувуудын тухай дуунд гардаг шувууд шигээ л буцчихлаа.
Гэхдээ тэр монголын урлагийн тэнгэрийн нэгэн тод од, рок попын хөгжилд туяа сацруулсан “Үүрдийн наран” байсаар байх болно.
Сэтгүүлч И.Буянжаргал
Одоогоор сэтгэгдэл алга байна
