Канадын баруун хэсэгт орших Бритиш Колумб мужид даваа гарагт хүчтэй аадар бороо орсны улмаас хөрсний гулгалт үүсч гол замууд хаагдлаа. Гамшгийн улмаас бүхэл бүтэн хотын иргэдийг нүүлгэн шилжүүлэх, нефтийн хоолойг хаахад хүргэсэн байна. Хурдны зам дээр машиндаа гацсан олон зуун хүнийг нисдэг тэрэгтэй аврагчид аварсан байна. Ванкувераас зүүн тийш 120 км (75 миль) зайд орших Агассиз уулын хотын ойролцоо 275 орчим хүн, түүний дотор 50 хүүхэд, 100 орчим тээврийн хэрэгсэл гацсан байсныг ийнхүү нүүлгэн шилжүүлжээ. Ванкувераас зүүн хойд зүгт 200 км-ийн зайд орших Меррит хотын удирдлага үерийн усны төвшин гүүрийг давж хальсан тул бохир ус цэвэрлэх байгууламжийг хааж, 8000 иргэнийг хотоо орхин явахыг тушаажээ. Ням гарагт зарим газар 8 инч (200 мм) хур тунадас орсон нь бүхэл бүтэн нэг сард ордог борооны хэмжээтэй тэнцэж байгаа юм. Даваа гаригт аадар борооноос үүдсэн үерт замууд идэгдэж, их хэмжээний шавар шавхай, 10 инч хүртэл усанд хучигджээ. Шуурганы улмаас Альбертагаас Номхон далайн эрэг хүртэл түүхий нефть тээвэрлэдэг Транс уулын хоолойг ч хаасан байна. Уг хоолой нь хоногт 300 мянган баррель нефть дамжуулах хүчин чадалтай юм.
Одоогоор сэтгэгдэл алга байна
