Оросын анги нэгтгэлүүд Крымд сургуулилт хийж байна
ОХУ Украинтай хиллэдэг хэсэгтээ цэрэг зэвсгийнхээ тоог нэмэгдүүлсний дараа НАТО-гийн тэргүүн Оросыг цэргийн төлөвлөгөөгөө ил тод байлгахыг уриалав. Йенс Столтенберг хэлэхдээ “Сүүлийн долоо хоногт ОХУ-ын арми хил дээр асар их бөөгнөрөл үүсгэж байгааг анзаарсан.
Харин Москва энэ хардлагыг үгүйсгэж, бүс нутагт НАТО-гийн үйл ажиллагаа эрчимжиж байгаад сэтгэл дундуур байгаагаа илэрхийлсэн юм. Брюссельд Украины Гадаад хэргийн сайдтай хэлэлцээ хийснийхээ дараа ноён Столтенберг “Хурцадмал байдал хяналтаас гарахыг зогсоох нь хамгийн чухал” гээд Оросыг түрэмгий үйлдэл хийхээс сэрэмжлүүлэв. Тэрээр "Цэргүүд ердийн үеийнхээс илүү бэлэн байдалд шилжиж байгааг бид анзаарч байна. Орос өмнө нь Украины эсрэг түрэмгийлэл үйлдэхийн тулд цэргийн хүчин чадлаа ингэж дайчлахад бэлэн байсныг бид мэднэ" гэжээ. 2014 оны 3-р сард ОХУ-д нэгтгэсэн Крымд Оросын цэргийн хүчний томоохон хэсэг байрлаад байна. Мөн Оросын дэмжлэгтэй салан тусгаарлагчдын хяналтад байдаг Луганск, Донецкийн нэр бүхий Украины зүүн хэсгийн Донбасс бүс нутагт цэргүүд олноороо цугларч байна. Украины Ерөнхийлөгч Владимир Зеленский өнгөрсөн долоо хоногт Украины хилийн ойролцоо Оросын 100 мянга орчим цэрэг байгаа гэж мэдэгдсэн юм. Британийн Ерөнхий сайд Борис Жонсоны хэвлэлийн төлөөлөгч хэрэв Орос Украйнд дайсагнавал Их Британи Украиныг дэмжих болно гэжээ. Мөн АНУ-ын хэвлэл мэдээллийн хэрэгслүүд Вашингтон өнгөрсөн долоо хоногт Европын холбооны холбоотнууддаа Москваг Украинд халдан довтлоход бэлтгэж байна гэсэн тагнуулын мэдээ өгсөн талаар анхааруулсан байна. Ням гарагт Британийн хамгийн өндөр тушаалын цэргийн офицер болох Генерал Сэр Ник Картер "Бид үргэлж сонор сэрэмжтэй байх ёстой" гэж мэдэгдсэн байна. Тэрээр Беларусь, Польшийн хоорондох хилийн хямралыг Орос Украины ойролцоо явуулж буй үйл ажиллагаанаас олон улсын анхаарлыг холдуулах арга хэрэгсэл болгон ашиглаж байна гэж хэлжээ. Дашрамд дурдахад ОХУ-ын Ерөнхийлөгч Владимир Путин өнгөрсөн ням гарагт Москвад төрийн төв телевизээр хэлэхдээ “Крымын ойролцоо Хар тэнгист НАТО-гийн байлдааны хөлөг онгоцууд цэргийн сургуулилт хийж байгаад санаа зовниж байна” хэмээн мэдэгдсэн юм.
Одоогоор сэтгэгдэл алга байна
