Монгол Улсын хэмжээнд цахилгаан эрчим хүчний хэрэглээ сүүлийн жилүүдэд дунджаар 7-8 хувиар өсч байна. Үүнтэй холбоотойгоор дотоодын эх үүсвэрүүдийн үйлдвэрлэлийн хэмжээг жил бүр 6-7 хувиар нэмэгдүүлж иржээ. Түүнчлэн Улаанбаатар хотод төвлөрсөн дулаан хангамжийн системд жилд дунджаар 190 Гкал/ц-ийн хэрэглээ бүхий 280 гаруй барилга байгууламж төвлөрсөн дулаан хангамжид холбогдож байна. Энэ нь хотын дулааны хэрэглээ жилд 7-8 хувиар өсөж байна гэсэн үг юм. Хэрэглээ ингэж жилээс жилд өсөн нэмэгдсээр байгаа ч үйлдвэрлэж буй өртгөөс бага үнэ, тарифаар борлуулдаг нь 92 тэрбум төгрөгийн алдагдалд оруулаад байна. Мөн импортын эрчим хүчийг хэрэглэгчийн үнээс өндөр үнээр худалдан авдаг нь ч өр үүсэхэд нөлөөлжээ. Тиймээс импортын эрчим хүчний хараат байдлаас гарахын тулд. “Тавантолгойн цахилгаан станц”, “Амгалан дулааны станц”, “ДЦС-2”, “ДЦС-3”, “Чойбалсангийн дулаан цахилгааны станц”-ыг өргөтгөх төслийг эхлүүлэхээр болоод байна. Мөн олон жил саатсан Эрдэнэбүрэнгийн усан цахилгаан станцын бүтээн байгуулалтыг ирэх хавар эхлүүлнэ . Уг станц ашиглалтад орсноор баруун бүс болон Алтай, Улиастайг дотоодын эрчим хүчээр бүрэн хангах боломжтой болно.
Одоогоор сэтгэгдэл алга байна
