АНУ-д олон жилийн өмнө банк дээрэмдсэн хамгийн дуулиант хэргийг илрүүлжээ. Дээрмийн хэрэг үйлдээд оргосон этгээдийг 52 жилийн турш эрэн сурвалжилсны эцэст олж тогтоосон тухай хууль сахиулах албаныхан мэдэгдлээ. Тед Конрад гэгч этгээд 1969 оны 7-р сард Охайо мужийн Кливланд дахь Нийгмийн үндэсний банкинд теллерээр ажиллаж байхдаа банкаа дээрэмджээ. Тэрээр өнөөгийн ханшаар 1.7 сая доллар буюу 1.2 сая фунт стерлингтэй тэнцэх 215 мянган доллар аваад ор сураггүй алга болжээ. АНУ-ын Маршалын албаны мөрдөн байцаагчид түүнийг дээрмийн хэрэг үйлдсэнийхээ дараа нь нам гүм, чимээгүй амьдарч байсан гэж мэдэгджээ. Энэ оны 5 дугаар сард уушгины хорт хавдраар нас барсан Конрад тухайн үед дөнгөж 20 настай байсан бөгөөд бор цаасан уутанд мөнгөө чихээд банкнаас гарч оргон зайлжээ. Банкны ажилчид хоёр хоногийн дараа мөнгө алга болсныг мэдэхэд Конрад сураггүй болсон байлаа. Маршалын албаны мэдээлснээр Конрад банкийг дээрэмдэх төлөвлөгөөгөө найзууддаа ярьж, үүнийг хийх нь хэр амархан болох тухай сайрхаж байжээ. Тэрээр 1968 онд Стив Маккуины хулгайн гэмт хэрэг үйлдсэн "Томас титмийн хэрэг" кинонд маш их дуртай байсан бөгөөд дээрмийн хэрэгт бэлтгэж байхдаа арав гаруй удаа үзсэн гэдэг. Маршалуудын хэлснээр Конрад алга болсныхоо дараа нэрээ Томас Ранделе болгон өөрчилж, Вашингтон ДС, Лос Анжелес руу зугтаж, улмаар хэргийн газраас 1000 км-ийн зайд Бостоны захад суурьшжээ. Мөрдөгчид Ранделегийн 1960-аад оны үед бүрдүүлсэн болон сүүлд бүрдүүлсэн баримт бичгүүдийг олох хүртэл энэ хэргийн учиг тайлагдаагүй байсан юм.
Одоогоор сэтгэгдэл алга байна
