НҮБ-ын Аюулгүйн зөвлөлийн барууны гишүүд Польштой залгаа хил дээр цагаачдын хямрал хурцдаж байгаад Беларусийг буруушаалаа.
Тэд мэдэгдэлдээ Беларусийг Европын холбооны зүүн хилийг тогтворгүй болгохын тулд цагаачдыг ашигласан гэжээ. Харин Беларусийн гол холбоотон Орос улс энэ буруутгалыг няцаасан юм. Өмнө нь Беларусийн удирдагч хэрвээ Европын холбоо шинэ хориг арга хэмжээ авбал Европ руу хий нийлүүлэхээ зогсооно гэж сүрдүүлсэн юм. Ирак, Сири, Йемений голдуу олон мянган хүн ЕХ-ны хил рүү нэвтрэх итгэл найдвар тээн Польштой хиллэдэг хил дээр өвлийн хүйтэнд зутарч байна. Цагаачдын ихэнх нь залуу эрэгтэйчүүд байгаа ч тэдний дунд цөөнгүй эмэгтэйчүүд, хүүхдүүд бас байгаа аж. Энэ долоо хоногийн эхээр олон хүн Польш руу нэвтрэхийн тулд өргөст торыг давсан ч Польшийн хилчид болон арми тэднийг хүч хэрэглэн зогсоосон байна. Гэхдээ зарим цагаачид хил давж чаджээ. НҮБ-д суугаа ОХУ-ын Элчин сайдын орлогч Дмитрий Полянский "Польш, Литвийн хилчид цагаачдыг зодож, Беларусийн нутаг дэвсгэр рүү буцаасан тохиолдол олон байна" гэж мэдэгдэв. "Энэ бол үнэхээр ичгүүргүй, олон улсын аливаа конвенц, дүрмийг бүрэн зөрчсөн явдал боллоо" гэж хэлжээ.
Одоогоор сэтгэгдэл алга байна
