Антарктидын оцон шувуу бүхэл бүтэн 3000 км урт замыг туулан Шинэ Зеландад ирсэн ховор тохиолдол гарчээ. Нутгийн оршин суугчид оцон шувууг өхөөрдөн түүнд Пингу хэмээх нэр хайрласан байна. Адели оцон шувууг анх далайн эргээс төөрсөн байдалтай байхад нь хүмүүс олжээ. Түүнийг олсон нутгийн оршин суугч Харри Сингх эхэндээ түүнийг зүгээр л "зөөлөн тоглоом" байна гэж бодсон гэнэ. Тэрээр эхнэрийнхээ хамт нийслэл Кристчерчээс өмнө зүгт 45 км-ийн зайд орших Birdlings Flat хэмээх суурингийн далайн эрэг дээр зугаалж явахдаа оцон шувуутай таарчээ. "Эхлээд би үүнийг зөөлөн тоглоом гэж бодсон чинь гэнэт оцон шувуу толгойгоо хөдөлгөж, энэ нь жинхэнэ гэдгийг ойлгосон" гэж ноён Сингх ВВС-д ярьжээ. Энэ нь Шинэ Зеландын эргээс Адели оцон шувуу олдсон гурав дахь тохиолдол юм. Пингуд хийсэн цусны шинжилгээгээр бага зэрэг тураалтай, шингэн алдалттай байсан аж. Энэ нь Шинэ Зеландын эргээс Адели оцон шувуу олдсон гурав дахь тохиолдол юм байна. Пингу оцон шувууг тэнхэрсэний дараа Бэнкс хойг дахь нохойгүй, аюулгүй далайн эрэгт аваачихаар төлөвлөжээ. Отагогийн их сургуулийн амьтан судлалын профессор Филип Седдон The Guardian мэдээллийн сайтад "Хэрэв жил бүр ингэж Адели оцон шувууд ирж эхэлбэл бид далайд ямар нэг зүйл буруугаар өөрчлөгдсөнийг ойлгох ёстой” хэмээсэн байна.
Эх сурвалж: BBC
Одоогоор сэтгэгдэл алга байна
