400 САЯ ТӨГРӨГИЙН ҮНЭТЭЙ ХУУЧИН КОМПЬЮТЕР ТОМОГРАФЫН АППАРАТЫН МӨРӨӨР.
Өнгөрөгч 2020 онд АХБ-наас манай улсад 1.0 сая, энэ 2021 онд 1.5 сая ам долларын буцалтгүй тусламж үзүүлсэн байдаг. 2020 оны буцалтгүй тусламжийн орлого болох 2 тэрбум 811.2 мянган төгрөгийг ЭМЯ нэмэлт санхүүжилтийн дансандаа хүлээн авчээ. Улмаар дээрх мөнгөнөөс 2020 оны 08 дугаар сарын 21-ний өдөр ДУБ ХХК-тай худалдах, худалдан авах тухай гэрээ байгуулж 400 сая төгрөгөөр ашиглагдаж байсан хуучин компьютер томографын аппаратыг худалдан авчээ.
Гэтэл ХӨСҮТ-д ашиглагдах ёстой, хүндэрсэн хүмүүсийн оношийг тодруулахад нэн хэрэгтэй өнөөх компьютер томографын аппарат нь удаа дараа эвдэрч сүүлдээ бүр таг ажиллагаагүй болов.
Сангийн яамнаас ХӨСҮТ-ээс энэ тухай тодруулахад Philips үйлдвэрлэгчийн 16 зүслэгт Briliance CT загварын тоног төхөөрөмж нь бүр 2005 онд үйлдвэрлэгдсэн эд болох нь тогтоогдов. Тус хуучин компьютер томографын аппаратыг ДУБ ХХК 2020 оны 05 дугаар сард ХӨСҮТ-д угсарч, мөн сарынхаа 05-ны өдөр хүлээлгэн өгсөн байна. Дээрх компьютер томографын аппаратын үндсэн оношилгооны тоног төхөөрөмж, хяналтын 4 компьютерын иж бүрдэл нь АНУ-ынх ч , бусад дагалдах хэрэгсэл болох тогтворжуулагч, цахилгаан дамжуулах шугам, газардуулга, агааржуулагч, камер, цацрагийн хамгаалалтын хаалга, өрөөний чийгшүүлэгч зэрэг нь Хятад, Орос, Солонгос, Монгол улсад үйлдвэрлэгдсэн ёстой л есөн шидийн иж бүрдэл байх нь тэр.
Хамгийн харамсалтай нь мөнөөх элдэв өнгийн цуглуулгаас бүрдэх хуучин компьютер томографын аппарат маань ашиглалтад орсноосоо хойш 9 удаагийн оношилгоо, засварт орж 2021 оны 07 дугаар сард таг эвдэрчээ. Ингээд эвдэрсэн тоног төхөөрөмжийг засахад дор хаяж 14 сая төгрөг шаардлагатай болсон бөгөөд засагдлаа гэхэд дахиад эвдрэхгүй гэх баталгаа байхгүй болсон байна.
Ийнхүү төсвийн хөрөнгө, тусламжийн мөнгө эрх мэдэлтнүүдийн гарын салаагаар үрэлгэн урссанд чухам хэн хариуцлага хүлээх вэ. Цар тахлын энэ хүнд үед улсдаа ганц гэгддэг ХӨСҮТ-д яагаад насжилт нь дууссан хуучин томографын аппарат авах болов гэсэн асуулт өөрийн эрхгүй хариултаа эрж байна.
400 сая төгрөг гэдэг бага мөнгө биш. Бүхэл бүтэн 400 сая төгрөгөөр авсан аппарат ажилладаггүй үхмэл хөрөнгө болж үлдсэнд хэн буруутай вэ?
Юутай ч ДУБ ХХК-иас худалдан авсан компьютер томографын аппаратын худалдан авалтын асуудлыг хуулийн байгууллагад шалгуул гэсэн үүргийг Сангийн яамны улсын ахлах байцаагч Д.Баатар, улсын байцаагч Б.Энхтуяа нар албан шаардлагаараа ЭМЯ-ны Төрийн нарийн бичгийн дарга Ц.Эрдэмбилэг, ТЗУГ-ын дарга П.Эрхэмбаяр, ТЗУГ-ын ахлах нягтлан бодогч Г.Түвшинтөгс нарт хариуцуулсан байна.
Хамгийн гол нь эвдэрхий компьютер томографын аппаратаас болж хэчнээн хүний амь нас, эрүүл мэнд эрсдэлд орж, ХӨСҮТ-д байхгүй компьютер томографын аппаратаас болж хувийн эмнэлгээр үйлчлүүлсэн иргэд хэдий хэмжээний мөнгө төгрөгөөрөө хохирсон бэ? гэдэг ноцтой асуудал.
ШИЛЭН ДАНС УХАЦГААЯ нийтлэл нэвтрүүлэг дараагийн дуаарт ЭМЯ-ны ажилтнууд хэрхэн хууль бусаар тендер сонгон шалгаруулж байсан тухай асуудлыг дэлгэх болно.
ШИЛЭН ДАНС УХАЦГААЯ !!!
Одоогоор сэтгэгдэл алга байна
