FACETV.MN сайт өнөөдрөөс эхлэн ШИЛЭН ДАНС УХАЦГААЯ нийтлэл нэвтрүүлгээ хүргэж байхаар боллоо. Бид энэ удаад цар тахлын нөхцөл байдлын үед ЭМЯ-наас хийж буй худалдан авалтыг тодрууллаа.
2021 оны 07 дугаар сард Ковид-19 цар тахлын эсрэг улсын төсвөөс олгосон болон хандив, зээл, тусламжаар ирүүлсэн хөрөнгийн зарцуулалтад Сангийн яамнаас шалгалт хийсэн байдаг.Энэ үеэр ЭМЯ-наас Энхийн шүүдэр ХХК-тай нарийн шүүлтүүртэй N95 маск ширхэгийг нь 20000 төгрөгөөр нийт 149700 ширхэгийг худалдан авах 2 тэрбум 994 сая 220 мянган төгрөгийн гэрээ байгуулсан болох нь тогтоогджээ. Хамгийн гол нь ЭМЯ энэ төрлийн маскийг тухайн үед нэг бүрийг нь 8000-10000 төгрөгөөр худалдан авах боломж байсаар байтал яагаад 2 дахин өндөр үнээр нийлүүлэх санал өгсөн компанийг тендерт шалгаруулав гэдэг нь ноцтой асуудал.
Мөн ЭМЯ Энхийн шүүдэр компанитай маскны эхний нийлүүлэлтийг 7 хоногийн дотор нийлүүлэх гэрээ байгуулж 1 тэрбум 497.1 сая төгрөгийг дансанд нь шилжүүлсээр байтал заасан хугацаанд нь маскаа нийлүүлээгүй байна. Түүгээр ч барахгүй Энхийн шүүдэр компани Эмийн үйлдвэр импекс ХХК-тай N95 төрлийн маск худалдах, худалдан авах гэрээ байгуулж нийт 2 тэрбум 943 сая 318 мянга 260 төгрөгөөр тухайн маскийг худалдан авч ЭМЯ-нд нийлүүлжээ. Энэ гэрээний дүнгээс л гэхэд Энхийн шүүдэр компани төсвийн хөрөнгийг ашиглаж 50.9 сая төгрөгийн шууд ашиг хийсэн нь анхаарал татаж байна.
Хамгийн ноцтой асуудал нь Энхийн шүүдэр ХХК зөвхөн компанийн зарлагын баримтаар маскийг хүлээлгэн өгсөнд байгаа юм. Өөрөөр хэлбэл тэд ЭМЯ-нд уг маскийг оруулж ирсэн гаалийн мэдүүлэг, гарал үүслийн гэрчилгээ зэргийг огт өгөөгүй байна.Тэгэхээр ЭМЯ-нд нийлүүлсэн гэх N95 маск нь хэзээ гаалиар орж ирсэн, жинхэнэ N95 маск мөн байсан эсэх нь тун ч эргэлзээтэй болж таарч байгаа юм. Магадгүй гарал үүсэл нь тодорхойгүй, чанар стандартын шаардлага хангахгүй маскнаас болж Ковид-19 цар тахлын халдвар хяналтаас гарч дэгдсэн бол хэн хариуцлага хүлээх вэ.
Сангийн яамнаас хийсэн шалгалтын явцад Эмийн үйлдвэр импекс ХХК-ийн 2020 оны 11 дүгээр сарын 22-ны өдөр импортолж оруулж ирсэн гаалийн мэдүүлэг ил болжээ. Эндээс үзэхэд тус компани 2 тэрбум 373 сая, 522 мянган төгрөгийн суурь үнэлгээ бүхий маск оруулж ирэхдээ гаалийн татвар болох 118.6 сая төгрөг, НӨАТ-ын 249.2сая төгрөг, нийт 367.9 сая төгрөгийн татварыг чөлөөлүүлсэн болох нь тодорхой байна.
Энэ бүхнээс чухам ямар булхай харагдаж байна вэ.
Энхийн шүүдэр ХХК нь Ковид-19 цар тахалтай тэмцэхээр анхан шатны тусламжийн эм, эмнэлгийн хэрэгслийн үнийг тогтвортой хямд байлгах үүднээс тухайн төрлийн барааны гааль, НӨАТ-аас чөлөөлж хөнгөлсөн Засгийн газрын бодлогыг үл тоон хэт өндөр үнээр N95 маскыг ЭМЯнд шахаж их хэмжээний ашиг хууль бусаар олсон нь тодорхой болж байна. Үүний ард ЭМЯ яагаад ийм өндөр үнээр маск нийлүүлэх саналыг хүлээн зөвшөөрч, тендерт шалгаруулав гэдэг асуулт зүй ёсоор гарч ирж байна. ЭМЯ яагаад хэт өндөр үнээр N95 маск нийлүүлэх санал ирүүлсэн компанийг шалгаруулав аа. ЭМЯ яагаад Энхийн шүүдэр ХХК-ийг гэрээгээр хүлээсэн үүргээ биелүүлэхгүй байхад хяналт тавьсангүй вэ. ЭМЯ яагаад Энхийн шүүдэр ХХК Төрийн болон орон нутгийн өмчийн хөрөнгөөр бараа ажил үйлчилгээ худалдан авах тухай хуулийн 41.2 дахь хэсэгт заасан “...Гүйцэтгэгч гэрээгээр хүлээсэн үүргээ гуравдагч этгээдэд шилжүүлэхийг хориглоно” гэсэн заалтыг зөрчсөөр байхад нь дуугүй байв гэдэг асуулт урган гарч ирж байна.
Энхийн шүүдэр ХХК болон Эмийн үйлдвэр импекс ХХК-иуд харилцан тохиролцсон гэх нэрийдлээр гааль, НӨАТ-ын хөнгөлөлтийг оролцуулан нийт 418,8 сая төгрөгийн ашиг олох боломжийг нээсэн нь ЭМЯ-ны буруу биш гэж үү.
Одоо та бүхэнд УБЕГ-ын Хуулийн этгээдийн нээлттэй өгөгдлийн сангаас авсан мэдээллийг харуулж байна. Эндээс үзэхэд Энхийн шүүдэр ХХК-ийн хувьцаа эзэмшигч гишүүдийн дунд Оргодолын Дамба гэх нэр байгааг та анзаараарай. Тэгвэл Эмийн үйлдвэр импекс ХХК-ийн Гүйцэтгэх захирал нь Дамбын Ууганзаяа гэж буйг та бас харж байгаа байх
Эндээс үзэхэд магадгүй аав нь өөрийнхөө компаниар дамжуулан яагаад ч юм ЭМЯ-нд хэт өндөр үнээр N95 маск нийлүүлэх тендерт шалгарч, түүнийгээ гуравдагч этгээд буюу охиныхоо компаниас худалдан авсан байж болзошгүй болж таарлаа. Ингэхдээ охиных нь компани гааль, НӨАТ-аас чөлөөлөгдсөн маскаа эцгийнхээ компанид нийлүүлсэн, тэрхүү компани нь тухайн маскыг татварын чөлөөлөлтөд хамрагдаагүй мэтээр төрд өндөр үнээр шахаж хагас тэрбум шахам төгрөгийн ашиг хийсэн байх магадлал өндөр байна.
Уг нь Засгийн газрын бүр 2020 оны 04 дүгээр сард баталсан тогтоолд N95 маск нь гааль, НӨАТ-аас чөлөөлөгдөх барааны жагсаалтад багтаж. Гэтэл Энхийн шүүдэр ХХК зүүний сүвэгчээр багтах уран заль хэрэглэж татвараас чөлөөлөгдсөн барааг чөлөөлөгдөөгүй үнээр ЭМЯ-нд нийлүүлсэн нь булхай биш гэж үү.
Уг асуудалтай холбогдуулан Сангийн яамны улсын ахлах байцаагч ЭМЯ-ны Төрийн нарийн бичгийн дарга Ц.Эрдэмбилэг тэргүүтэй холбогдох албан тушаалтнуудад эл тендерийн асуудлыг хуулийн байгууллагад шилжүүлэн шалгуулах тухай албан шаардлага тавьсан байдаг. Энэ албан шаардлага амьдрал дээр хэрэгжсэн эсэх талаар бид эргэн мэдээлэх болно.
ШИЛЭН ДАНС УХАЦГААЯ эрэн сурвалжлах нийтлэл нэвтрүүлэг дараагийн дугаарт ХӨСҮТ-д шахсан хуучин тоног төхөөрөмжүүд, түүнээс үүдэн төр хэдэн төгрөгөөр хохирсон, иргэд хэрхэн чирэгдэж байгаа асуудлыг бид дэлгэх болно. ШИЛЭН ДАНС УХАЦГААЯ
Одоогоор сэтгэгдэл алга байна
