Москва хотын эрх баригчид 10 дугаар сарын 28-наас 11 дүгээр сарын 7-ны хооронд хөл хорио тогтоохоор болсныг мэдэгдлээ. Энэ хугацаанд зөвхөн эмийн сан, зайлшгүй шаардлагатай бараа бүтээгдэхүүний дэлгүүрүүд ажиллана.
Москва хотын дарга Сергей Собяниний мэдэгдсэнээр худалдааны төв, кино театр, амьтны хүрээлэн, биеийн тамирын заал, гоо сайхны газруудын үйл ажиллагааг зогсооно. Зоогийн газрууд зөвхөн авч явах эсвэл хүргэлтээр үйлчлэх боломжтой.
Театр, музейд үзэгчдийг зөвхөн QR кодоор нэвтрүүлж, танхимын дүүргэлтийг 50 хувиас хэтрүүлэхгүй байх дэглэм мөрдөх ажээ.
Москвад пүрэв гарагт 7897 шинэ тохиолдол бүртгэгдсэн бол өмнөх өдөр нь 5847 тохиолдол шинээр илэрчээ.
Өмнө нь ОХУ-ын Ерөнхийлөгч Владимир Путин 10 дугаар сарын 30-наас 11 дүгээр сарын 7-ны өдрүүдийг ажлын бус өдөр болгон зарлаж, бүс нутгуудийн эрх баригчдын шийдвэрээр сунгаж болно гэдгийг онцолсон юм.
Собянин мөн 11 дүгээр сарын 8-наас эхлэн Москвад вакцин хийлгээгүй 60-аас дээш насны хүмүүсийн хөнгөлөлтийн картыг хаана гэж мэдэгдэв. Эдгээр хүмүүс вакцин хийлгэснийхээ дараа картаа нээлгэх боломжтой болно. Сүүлийн зургаан сарын хугацаанд коронавирусээр өвчилсөн хүмүүст энэ хязгаарлалт хамаарахгүй юм байна.
Одоогоор сэтгэгдэл алга байна
